ОВЛIС-УДЖАВЛIС ВАЛЕРИЙ МАРТЫНОВ

ОВЛIС-УДЖАВЛIС ВАЛЕРИЙ МАРТЫНОВ

Кад лэбзиг-мунiгöн кыдзкö он нин и удитлы казьтывны вöвлöм уджъёртъяснымöс, кöть войдöр накöд волысьлi вель тшöкыда. Кадпасö видзöлiг неважöн казялi, мый таво тырас эськö 85 арöс филология кандидат Валерий Иванович Мартыновлы, нималана коми литературоведлы да дзоньнас коми гижан культура туялысьлы. Дерт, ловья кö вöлi öнöдз. Тöдöмысь, öнiя томуловлы тайö нимыс дзик нин тöдтöм, сiйö кольöма небöгкудъясын йöзöдлöм гижöдъясас да газет-журналын уна статтяын. Öтуввезйысь весиг эз сюр тайö морт йывсьыс немтор.

Валерий Иванович йылысь кöть кывлi-тöдмавлi Сыктывкарса университетын велöдчигам на сыöн гижöм небöгъяс серти, збыль тöдмасьöмыс лои сöмын 1986-öд воын, кодыр пыри уджавны Кыв, литература да важвылöм туялан институтö. Сэки сiйö вöлi веськöдлö литература туялан юкöдöн. Оз вöлi ёнасö и петавлы уджвежöссьыс, öд сiйö эз тшынасьлы ни эз больгы уджъёртъясыскöд быдсяма немторъяс йывсьыс. Сöмын медводз дженьыда юöртам туялысьлöн олантуй йывсьыс.

Валерий Мартынов чужлöма 1933-öд вося вöльгым тöлысь медводдза лунö Киров обласьтса Кырчанск районысь Ильинск сиктын, но сэсся мамыс вайöдöма писö Коми муö, Ыб сиктö, кытöн 1948-öд воын помалöма 7 класса школа, сы бöрын велöдчöма Сыктывкарын зонкаяслы 12-öд №-а шöр школаын, петöма сэтысь эзысь медальöн. 1955-öд воöдз велöдчöма Коми каналан педiнститутын да сiйöс помалöм бöрын служитöма Совет армияын Карелияын да Германияын, велöдöма 8 во чöж роч кыв да литература Интаын. Сэки нин ачыс кывбуралöма да веськöдлöма литература йöзкытшöн. Енбиа том велöдысьöс та бöрын корöны велöдны студентъясöс Коми педiнститутö, но том мортöс ёна нин кыскöма туялан уджö. Коми мортлы век вöлöма матысса ас кывъя литература. Коми литература роч литературакöд йитöдын — тайö лоöма сылöн шöр туяланторнас. 1967-öд восянь сiйö уджалö Сöвет Öтувлунысь наукаяс академияса Коми филиалын, Кыв, литература да история институтын, öдйö быдмö литература юкöдöн веськöдлысьöдз, тайö уджсö нуöдö 17 во чöж. 1973-öд воын Ленинградын Роч литература институтын (Пушкин керкаын) туялысь дорйö кандидат ним вылö ассьыс диссертациясö «Роль русских писателей в формировании литературы коми» тема вылö (туялан юрнуöдысьнас вöлöма туялысь да нималана кывбуралысь А.Е. Ванеев). 2003-öд восянь туялысь зiльöма, важ нимöн кö, Велöдысьяслысь сям сöвмöдан институтын профессор чинын, унатор вöчöма велöдчан небöг дасьтан-гижан удж нырвизьын. Дзоньнас олöм чöжыс йöзöдöма 348 удж: некымын монография, препринт, уна газет стаття, на лыдын унатор йöзöдöма комиöн, мый он казяв öнiя литературоведъяслысь. Аслас котырнас кувтöдзыс мортыс овлöма юркарын кык судтаа пу керкаын, бурджык оланiнсö абу корлöма. Кувсьöма Валерий Иванович куим во сайын, косму тöлысь 18-öд лунö. Сьылöдiсны шонъянöйöс Эжвакарса вичкоын, дзебисны Човса шойнаö.

Мыйсюрö окота пасйыштны сы йылысь кыдзи морт йылысь. Лючкиа тöдмасьны мем сыкöд вичмис сöмын 1986-öд воын, а бурасö сёрнитны нöшта на сёрджык. Ставыс сы сайын вöлi, мый Валерий Мартынович уджвежöссьыс петавлö вöлi вывтi шоча, сöмын ыджыд коланлун серти: век уджавлiс, лыддьысьлiс, гижлiс, редактируйтлiс. Мартынов ёрт ас кадö веськöдлöма да редактируйтлöма куим тома «Коми литература история» небöг, а сiдзжö чукöрлöма да лöсьöдлöма «Куратов йылысь лыддьысьöмъяслысь» став квайтнан петассö. Буретш бöръя татшöм небöгас В.И. Мартынов менсьым ёна корис кутшöмкö гижöд, кöть сэки ме сöмын на пырöдча вöлi збыль туялан уджас. Жаль, дерт, татшöм небöг сериясö сэсся дугдiсны лэдзны.

Лючкиджык туялысьсö тöдмалi 1988-öд вося гожöмö юрасигöн. Сэки сöвет кадö Наукаяс академияса Коми филиал шепалiс «Межадорса» совхоз вылын да быд гожöм-ар туялысьяс зiля уджалiсны куран-вилаöн, овлiсны сиктас вежонъясöн. Со и ыстiсны миянöс сэтчö турун пуктыны, да вежон чöж Мартынов да ме öтлаын юръяс вöчалiм да быдторсö сёрнитлiм. Вöлöмкö, уна во чöж Валерий Иванович ачыс гижалöма кывбуръяс, дерт, аслыс, абу йöзöдöм вылö. Со и сэки миян тöдсаяс йылысь сiйö лöсьöдалö вöлi виршъяс да меным лыддьö донъялöм могысь. Дерт, öтвылысь век серам пычким öта-мöдлысь. Вöлöмкö, сiйö матö ставсö тöдö коми гижысьяс, критикъяс йылысь, но некор некодöс эз лёкöдлы, некодöс эз серавлы. Збыльысь, кöть сiйö век вöлi лабутнöй, но асьсö перестройкаасигöныс унаторйысь пондiсны мыжавны, лыддьыны олöмсьыс кольöм мортöн да с.в.

Мукöддырйи сёрнитлiс и шмониттöг, мöвпалöмöн. Юрысь оз пет öти сылöн шуöм: збыль литературоведöн пö вермас лоны сэтшöм морт, кодi небöгъяс лыддялöм кындзи ачыс нин вöлi арлыда, унатор ас гöгöрсьыс аддзылöма да ас пытшкас чöжöма, ловкылöмъяс да мöвпъяс. Дерт, ассьыс олан туйсö тöд вылас кутöмöн тайöс шуис. Сэкитö ме та дор эг сувт, а öнi мöвпала дзик мöд ног нин — Мартынов вöлi тырвыйö ина, прав.

Мортыс сiйö вöлi дзик авъя, абу ыкша, гораа некор йöзкöд эз сёрнитлы, эз горзывлы, эз видчыв ни, век зiльö вöлi воны öтсöгласö, кöть и, гашкö, ставсö сэки тырвыйö эз имитлы. Та дыра завалiгад сы вылö ёна волiсны уджъёртъясыс, но сiйö кыдзи веськöдлысь кужлiс кусöдны кыптысь зыкъяссö. Вежласян-перестройка кадö институтö воалiс томулов, мöд, «выль» видзöдласа йöз. В.И. Мартынов мунiс литатура юкöнöн веськöдлысь удж вылысь да пондiс уджавны асшöра, сöмын доктор ним вылö гижöм нин дась диссертациясö дорйыны уна помка вöсна эз вермы. Та вылö видзöдтöг, выльлаын нин уджалiг сiйö эз эновтчы туялан уджсьыс, унатор гижис вичко литература йылысь, пыртiс туялöмö выль гижысьясöс. Водзтi коммунист да атеист, туялысь пырöдчöма вöлöм веськыда эскана вичко олöмö, комиöдлöма сьыланнога службаяс, велöдлöма коми кывйö Сыктывкарса да Вöркутаса аркирейувса вежаайясöс, на лыдын и öнiя Питирим аркирейсö. Бöръяыс аслас сёрниясас век бурсиö тшöтш комиöн, республикаса юралысьяс моз оз сöмын сёрнит рочöн.

2003-öд во бöрын Мартынов ёртным дугдiс пыравлыны чужан институтас, сыкöд позис вочаасьлыны кызвынсö «Войвыв кодзув» да «Арт» журнал редакцияясын, кытчö сiйö окотапырысь ваявлö вöлi ассьыс статтяяс. Кöть мортыс абу нин миянкöд, сылöн вежöрыс да сямыс кольöма уна небöгö, вель уна йöз сы йылысь тöдöны, оз вунöдны. «Коми гор» радиоысь корсюрö позьö на кывлыны сылысь тэрмасьтöм, но бура мöвпыштöм сёрнисö коми литература да гижысьяс йылысь. Туялысьлöн уджыс коми йöзлы лои зэв колана.

Цыпанов Йöлгинь

0 ответы

Оставить комментарий

Want to join the discussion?
Feel free to contribute!

Добавить комментарий

Ваш e-mail не будет опубликован. Обязательные поля помечены *