iiКоркö велöдчылiм Владимир Дёминлысь (туялысь чужöмсяньыс 80 во)

Коркö велöдчылiм Владимир Дёминлысь (туялысь чужöмсяньыс 80 во)

Кыдзкö важ газет-журнал киын бергöдлiг юрам воис гажтöм мöвп: талунъя коми петасъясысь он нин аддзы, он лыддьы гижöдъяссö Юшков Геньлысь, Тимин Володьлысь, Торопов Иванлысь, Ванеев Альбертлысь, Микушев Анатолийлысь да уна мукöд миянысь мунöм вежöра йöзлысь. Натöг дзоньнас коми культураа олöмыс ёна жебмис. Мыйта бурсö эськö найö öнi, гашкö, гижисны. Он аддзыв нöшта и Дёмин Владимир Николаевичöс, кодлы эськö тавося сора тöлысь 28-öд лунö тырис 80 ар. Колö, дерт, казьтыштны Тентюковын чужлöм тайö айловсö, коми литратура нималана туялысьöс, наукаса докторöс.

Владимир Николаевич Дёминкöд тöдмасьлi Сыктывкарса канму университетын велöдчигам на, сэкся студенлы тайö мортыс медводз воссис кыдзи зэв аслыспöлöс велöдысь, университетса сэкся мукöд велöдысьъясысь зэв торъялана вöлi да. 80-öд вояс заводитчигöн коми кыв да литература велöдлiс ми воклы уна тöдчана туялысь, сьöмыс сэки тырмывлöма коравны Сыктывкарö лекцияяс лыддьыны Илля Васьöс Канкар-Мöскуаысь, Адольф Туркинöс Таллинысь, Григорий Нечаевöс Таганрогысь, Валей Кельмаковöс да Риф Насибуллинöс Ижкарысь. Ас кафедраса велöдысьяс дорö отсöг вылö волöны вöлi тшöтш Наукаяс академияса Кыв, литература да история институтын уджалысьяс Геннадий Бараксанов, Владимир Ляшев, Анатолий Ракин да Владимир Дёмин, бöръя куимыс сэки том на филология кандидатъяс вöлiны. Дерт, татшöм вына велöдöм пондаыс СКУ медводдза помалысь коми филологысь быдмис уна енбиа туялысь да велöдысь. Налöн пайыс тöдчö и öнi.

1981-öд вося тувсов семестрын миян велöдчан уджтасö пыртiсны «Коми поэма» торъякурс, индöма вöлi тшöтш лыддьысьсö — к.ф.н. В.Н. Демин. Таöдзсö, дерт, ми сiйöс эгö тöдлöй. Да и лыддянторйыс кажитчис зэв нин тöдса, öд коми литератураысь экзаменъяс сеталiм да поэмаяс йывсьыс миянлы уна нин висьтавлiсны. Мый быттьö сы йылысь унасö позьö сёрнитны? Тадзи унаöн мöвпавлiм. И со медводдза лекция вылö миян Евгений Александрович Игушев сэкся деканным, зэв визув, нюмъялысь да шмонитысь доцент, пыртöдiс аудиторяö шöркост арлыда, топыд вир-яя, еджгов юрсиа, кызкодь паръяса велöдысьöс, аслас ыджыд бакенбардъяснас ортсысяньыс Александр Пушкинлань мунысь лекторöс, тöдмöдiс миянкöд. Пондiс лыддьыны Владимир Николаевич ньöжмыда, тэрмасьтöг, медводз юöртiс торъякурсыслысь могъяссö, тэчассö да вайöдiс содтöд лыддьöм могысь вель уна туялан литература. Кöть пондылiс комиöн лыддьыны, сэсся вуджис рочö, тыдалö, лыддянторйыс гижöма рочöн вöлöма да. Сöмын весиг эз теманас шензьöд да шемöсмöд миянöс тайö выль велöдысьыс, а медсясö лекция лыддянногнас. В.Н. Дёмин юрсьыс лыддис зэв уна кывбур, поэмаысь тор, и эз сöмын коми поэзияысь, а рочысь да мудорсайсаысь. Унатор висьтавлiс и кывбуралысьяслöн олöм йывсьыныс. Лекцияса стöч тема йывсьыс вöлi висьталö дженьыда да стöча, уна кывбурйысь торъяс лыддьöмöн, тэрмасьтöг да гораа. Мукöд велöдысьяс тамдасö эз тöдлыны ни эз лыддьывны, пырджык вöлi гажтöм анализö пырöдчöны, быдсяма тöдтöм терминъясöн печласьöны. Коми студентъяс пукалiм шы ни тöв, быттьöкö эг вылыс велöдчанiнын вöлöй, а поэзия салонö пырим. Владимир Николаевич литературасö велöдö вöлi литератураöн, поэзиясö кывбурöн, сылысь мичсö медводз петкöдлöмöн. Нöшта öтиторйöн венiс сiйö студентъясöс — велöдысьным эз торйöдлы коми поэзияöс мукöд литератураясысь, унатор йитлiс, öткодявлiс, орччöдлiс, öтув лыддьывлiс Нёбдiнса Витторöс да Шекспирöс, Илля Васьöс да Твардовскийöс, Иван Куратовöс да Есенинöс. Сиктысь петалöм велöдчысьясöс тайö ёна шензьöдiс.

Кыдзкö тöдлытöг колис кадыс, торъякурсысь зачотсö В.Н. Демин пуктiс ставнымлы юасьтöг да, дерт, гöгöрвоöмöн: медшöр могсö, поэзия дорö муслунсö пыртöма нин том йöз юръясö. Тайö кадсяньыс став студентыс бура тöдмалiс велöдысьнымöс, век нин чолöмасям вöлi уличьясын паныдасигъясö. Мортыс пöрис юрвежам яръюгыд серпасö.

1986-öд восянь пондi уджавны В.Н. Деминкöд öти институтын, öти судтаын пукалiм, лоим бур уджъёртъяс. Сэксянь нин бурджыка тöдмалi сiйöс кыдзи туялысьöс да мортöс. Меным сiйö сьöлöмö йиджис медводз аслас ловкылöмнас, коми литература дорö аслас пöсь йитöднас. Буретш сiдз шусяна вежсян-перестройка кадö сiйö бöр воис Велöдысьясöс сöвмöдан институтысь уджавны Кыв, литература да история институтö (КЛИИ-ö), пуксис веськöдлыны литература юкöдöн. Дёминлöн вöлiны зэв гырысь кöсйöмъяс, медтöдчанаыс на пиысь гижны коми литературалысь выль история. Жаль, тайö уджтасыс коли сöмын кабалаын, дасьтöм текстсö сетiсны Коми туялан шöринса аркивö, эз йöзöдны. Оз вöдитчыны сiйöн тшöтi литература туялысьяс. Та вылö видзöдтöг водза-водз кувтöдзыс В.Н.Дёмин унатор удитiс вöчны: гижис да дорйис докторлысь диссертация, йöзöдiс некымын ыджыд монография, котыртлiс гырысь конференцияяс, бергöдiс туялöмö Каллистрат Жаковлысь да Г.С. Лыткинлысь нимъяс, дасьтiс коми литература историялысь выль бала, пуктiс панас «Сыктывкар» йöзкост котырлы. Дзоньнас йöзöдöма сiйö 213 туялан удж, на пиын некымын гырысь удж-монография. Тайö öти мортлы вель уна.

Мунiс тала югыдсьыс Владимир Николаевич 61 арöс неуна тыртöдзыс тырвыйö вынйöра туялысьöн. 19 во нин абу мортыс миянкöд, но сiйöс казьтылöмыс кольö юрвежöраным. Сэнi сiйö ловъя.

Цыпанов Йöлгинь

0 ответы

Ответить

Want to join the discussion?
Feel free to contribute!

Добавить комментарий

Ваш e-mail не будет опубликован. Обязательные поля помечены *