ТАРТУ — УНИВЕРСИТЕТА МОНОКАР

ТАРТУ — УНИВЕРСИТЕТА МОНОКАР

Векджык монокаръяс йылысь сёрнитлöны, эм кö карас ыджыд пабрик-завод, шахта либö кöрт туй станция. Но эмöсь и туясян-велöдчан монокаръяс. Важся Тарту карсö öтувтö Эстонияын дзик öти сiдз шусяна классиканогса университет, кодöс вöлi подулалöма 1632-öд воын шведъяслöн каналан кадö на. Уна факультета вылыс велöдчанiн шевкнитчöма став кар пасьтала: велöдчан корпусъяс, öтуволанiнъяс, торъя институтъяс. Университетса медыджыд да медтöдчана стрöйбаыс велöдчысьяслы, дерт, куим судтаа ыджыд библиотека-небöгкуд, кодöс неважöн на восьтöмаöсь дзоньталöм бöрын. Уджмогöн пыралiм нöшта гуманитарнöй факультетса Эст кыв да öтувъя лингвистика институтö, кöнi студентъяслы велöдöны эст, суоми да мукöд фин-угор кывъяс, тшöтш и коми кыв. Велöдö коми кывсö миян земляк, философия доктор Николай Владимирович Кузнецов, кодöс унаöн тöдöны тшöтш кыдзи серпаса литература комиöдысьöс. Асьсö шуö коми ног Лади Микол. Сэтчöс институтас видзöны Тарту карын дорйöм диссертацияяс, мукöд зэв колана удж.


ТАРТУ — УНИВЕРСИТЕТА МОНОКАР

Буретш Микол вöзйис ветлыны выльöн на восьтöм Эст войтырлöн музейö, кодöс кыпöдöмаöсь кар помас Францияысь кужысь йöз. Ветлiм сэтчö öти шондiа лунö да шемöсмим музей ыдждасьыс: выль стрöйбаыс тыдалö зэв ылiсянь да ортсысяньыс сiйö енэжö кыпöдчан трамплин кодь. Сэтчöс веськöдлысьясыс бара вöлöмны мудерöсь: абу кыпöдöмаöсь музейсö миян Финн-угор этнопарк моз Сыктывкарысь 50 километра сайö, а дзик кар дорас. Автобусысь петалан туристъяскöд пырим музеяс, кöнi позьö öттшöтш ньöбасьны, сёйны-юны ресторанын, нуöдны конференцияс, велöдны студентъясöс. Нимкодь, мый сэтчö лöсьöдöмаöсь торъя ыджыд экспозиция урал войтыръяс йылысь. Сiйö кузь ю-туй сяма, кодi вожъясьö торъя войтыръяс вылö. Перым (коми да удмурт) войтыръяс ю-туй кузя медводдзаяс, кыпöдöмаöсь весиг дзонь коми керка, некутшöм мукöд войтырлöн сэсся керкаыс абу. Пыралiм сэтчö да пукыштiм лабичас, кывзiм шыяс: кодкö паччöрас шкорйöдлыштö-узьö, трубаас омлялö турöб, югыд сетан пачас мыйкö варкйö-пуö. Енув пельöсас Перымса Степан серпаса енпöв, залавкаас тасьтi-пань, мукöд гортса кöлуй. Мукöд войтыръяслы сиöм эеспонатыс ёнджыкасö паськöм да мичмöдантор, а помалö урал войтыр котырöн тöдмöдöмсö йöгра-яранъялы сиöм чум да чери кыянторъяс. Колö шуны, музейыс интерактивнöй, быдласянь кылöны шыяс, сьыланъяс, ош марзö манси пельöссяньыс. Экскурсиясö нуöдöны некымын кывйöн, тшöтш рочöн. Мöд медыджыд юкöныс инмö эст войтырлы, петкöдлöма историяын сылысь туйсö археологъяслöн медваж аддзöмторъяссянь, талунъя серпасъясöдзыс. Колö торйöн пасйыны, мый татшöм музеяс ставсö вöзйöны видлавны ас киöн, видлыны ас вылö важ паськöмъяс, кутчысьыштны уджалан кöлуйö да с.в.

ТАРТУ — УНИВЕРСИТЕТА МОНОКАР

Неуна висьтышта Тарту карын олысь йöз йылысь. Коркö сöвет кадö на сэнi олöма 100 000 сайö морт, весиг Эмайыги ю вадорас вöлi сувтöдöмны сё сюрсöд кага чужöмлы сиöм казьтылан мыгöр, буретш 100 000 лыдпас изйысь сёртöмöн. Таво сэнi олöны этшаджыкöн, 93 124 морт. Унджык олысьыс эст, найö став олысь пöвстын 80%. Та вöсна быдлаын юргö эст кыв, кöть лавка-ресторанъясын кужöны рочöн, суоми ног да англия кывйöн. Бöръя кадас сэтчö волö уна турист. Роч кывъя йöзыс вочасöн чинö, öнi найö 15% мында, а вöлöма во дас вит сайын 21 %. Кöть мый эн шу, но том йöзыс пö бöръя кадас муналöны, овмöдчöны Таллин юркарас, Суомиö, Европа Öтувлунса мукöд канмуö. Дай Таллин кыдзи ыджыд кар да юркар бöръя воясас сöвмö пö ёнджыка, а тайö ставыс кыскö сэтчö йöзöс.

0 ответы

Ответить

Want to join the discussion?
Feel free to contribute!

Добавить комментарий

Ваш e-mail не будет опубликован. Обязательные поля помечены *