Кудымкар чукöртic став комисö
Сора тöлысь 8-9-öд лунъясö Перым дормуысь Коми-Перым кытшса Кудымкар юркарын вöлi котыртöма аслыспöлöс петкöдчöм-гаж, нимтöма сiйöс вöлi рочöн: «Народы коми: история, культура, сотворчество. Этнокультурный форум». Чукöртчисны сэтчö коми войтырлöн матö став тöдчана йöзчукöръясысь воысьяс: перым-комиясысь кындзи ми, зыран-комияс, перым-комияс да камайывса (зюзьдiнса) комияс. Бöръяясыс олöны Киров обласьтса Афанасьевскöй районын некымын сиктын. Сыктывкарысь Кудымкарö ветлiс дзонь делегация, кытчö пыртöдöма вöлi республикаса музейын, библиотекаын, национальнöй политика министерствоын уджалысьясöс, «Бикинь» журналса шöр редакторöс да öти туялысьöс, ак сiдзжö Пöзтыкерöсысь «Любава» сьылан котырысь артистъясöс. Культуракöд йитчöм уджтасысь кындзи сэнi юргисны тшöтш туялан докладъяс коми йöзлöн важвылöм да öнiя лун йылысь, пермяне войтырним да перым-коми войтырлöн генофонд йылысь. Коми кывйöн лыддьöм дзик öти докладöн сёрнитiс филология доктор, Кыв, литература да история институтын зiльысь Евгений Александрович Цыпанов. Сёрнитантор нимыс вöлi «Перым-коми гижöд кыв паськöдан туйяс йылысь». Мöд луннас, сора тöлысь 9-öд лунö, вöлi Кудымкарлöн кар лун гаж, позис сэки ветлыны музейö экскурсияöн, кывзыны частушкаяслысь сьылан вен, видзöдны карса шöр изэрдын кыпыд концерт. Форум нуöдан лунъясö лои кырымалöма миян войтыркост политика министерство да Перым-Коми кытшса министерство костын торъя сёрнитчöм. Сiдзкö йитöдъяс миян Коми республика да Перым-Коми кытш костын водзö ёнмасны.
(далее…)
