КЕЛЬЧИЮР КАЗЬТЫШТIС А.Ф. СМЕТАНИНÖС

КЕЛЬЧИЮР КАЗЬТЫШТIС А.Ф. СМЕТАНИНÖС

Изьва му важысянь нималö оз сöмын винёв спортсменъясöн, писькöс йöзöн, гижысьясöн да артистъясöн, но и енбиа туялысьясöн. Нималана историк да веськöдлысь Александр Франсович Сметанин чужлöма Кельчиюр сиктын 1949-öд вося 24-öд лунö. Ичöтдырсяньыс зонкалöн олöмыс вöлöм йитчöма видз-му овмöскöд, такöд öттшöтш сiйö бура велöдчöма да школа помалöм мыстиыс пырöма велöдчыны Коми педагогика институтö история-филология факультетö, помалöма велöдчанiнсö историк дипломöн. Туясьны радейтысь студентöс казялöмаöсь да корöмаöсь пырны велöдчыны водзö СССР Наукаяс академияса Коми филиалса аспирантураö, кöнi сiйö пырöдчöма Айму вöсна Ыджыд тышводзвывса колкозъяс овмöс туялöмö, профессор Я.Н. Безносиков юрнуöдöм улын гижöма кандидат ним вылö диссертация. Сэсся А.Ф. Сметанин быдмöма Кыв, литература да история институтса директорöдз, дзоньнас Коми туялан шöринöн веськöдлысьöс вежысьöдз. Та дырйи некыдзи абу орöдчывлöма и аслас ичöт чужанiнсяньыс. Олöмыс сылöн помасьöма другöн 2010-öд во помын, а сылысь нимсö нин сэсся сетöмаöсь чужан школаыслы.

КЕЛЬЧИЮР КАЗЬТЫШТIС А.Ф. СМЕТАНИНÖС

Косму 24-öд лунö школаас вöлi котыртöма А.Ф. Сметанинöс казьтылана торъя чукöртчöм. Лун шöр кад кежлö ыджыд залас локталiсны мича паськöма ныв-пи, быдöнлöн морöсас Вермöмлы сиöм вундас, велöдысьяс, Александр Франсовичлöн ёртъясыс да рöдвужыс, юрсиктысь воöмаяс. Панiс чукöртчöмсö школаса директор Л.Н. Семяшкина, сэсся сёрнитiсны ичöтдырся ёртъясыс, коркö öти классын велöдчысьясыс, студенталан кадся ёртыс Сметанин Леонид Борисович, А.Ф. Сметанинлöн Валентина да Ирина чойясыс, сьылiсны да йöктiсны челядь да велöдысьяс, петкöдчисны тшöтш сэтчöс клубын аскöсйöмöн ворсысьяс. Вöлöмкö, туялысь быд шойччöгö волывлöма чужан сиктас, ставныскöд волысьöма, зiльлöма век тöдмавны сиктса выльторъяс. Да öд и аслас туяланторйыс сылöн вöлöма буретш республикаса видз-му овмöс сöвмöм. КЛИИ-ысь директорöс вежысь Е.А. Цыпанов сёрниас тöдчöдöма Александр Франсовичлысь история туялöмö пайсö (гижöма да йöзöдöма сiйö 200 сайö удж), казьтыштöма сылысь веськöдланногсö, бур öбичасö, йöзлы отсавны дасьлунсö. Бöръяпомас юргис А.Ф. Сметанинлöн медрадейтана сьыланкывйыс, сэнi эмöсь кывъяс «Есть только миг…» Вöлöмкö, тайö сьылансö ачыс комиöдлöма весиг да сьывлöма. Аскылöмыс чукöртчысьяслöн вöлi öтпырйö кыпыд да шог, уналöн весиг синваыс мыччысьлiс.

0 ответы

Оставить комментарий

Want to join the discussion?
Feel free to contribute!

Добавить комментарий

Ваш e-mail не будет опубликован. Обязательные поля помечены *